Aking Tula...:-)

Pamamaalam sa Isang Pangarap

May mumunting pangarap ang sa aki’y umusbong
Sa musmos kong kaisipan ay kinalinga ng imahinasyon
Minutya ng aking puso at dinakila ng aking dunong
Itong pangarap na puspos ng dedikasyon

Lumipas ang panahon nagbago ang lahat
Ang mundo ay hindi pala ang matagal ko nang pinangarap
Taliwas sa inaakala, kabaligtaran ng lahat ng dapat
Maka-ilang ulit akong nilisan ng magandang hinaharap

Unti-unting naglaho ang aking pangarap
Sa mundong taliwas natutunang magpanggap
Hindi man ninais ng sarili ngunit itinago ang hirap
Kailangang matutong makibagay, matutong tumanggap

Hinanap ko ang aking kamusmusan, ang aking pagkabata
Ang pangarap na pinangakong matutupad
Ngunit ito’y naglaho at tila sinalanta
ng katotohanang mapait at sinumpa

Muli kong nilingon ang aking nakaraan
Ang tanging namutawi ay isang pamamaalam
Pamamaalam sa pangarap ng musmos na naglaho kung saan
Patawad dahil hindi na makakamit ang matagal nang inaasam