Aking Tula...:-)

Anong Mayroon ang Isang Tula?

Anong mayroon ang isang tula
na bumibighani kahit sa simpleng panimula?
Anong mayroon ang akdang ito
na bumibihag sa kahit na kanino?

Anong mayroon ang isang tula
na sa isipan ay tumatagos gaya ng tudla?
Anong mayroon ang isang tula
na umaani sa mambabasa ng tuwa

Anong mayroon ang isang tula
na may dalang rikit sa wakas at simula?
Anong mayroon ang isang tula
kung saan ang imahinasyon ay malaya?

Anong kapangyarihan ang taglay
ng sulating siyang sa makata ay buhay?
Ano ang nagtatago sa likod ng kanyang ritmo
na umaakit sa isang tulad ko at tulad mo?

Ang indayog ng bawat linya nito
na tila sa mambabasa’y sumasamo
Ang himig ng pag-iisang tunog
na tamis sa pandinig ang handog

Ang matamis na panambitan ng isang makata
Na bumabalong ng galak sa kanyang akda
Ang bahagi ng sarili na pilit iniwan
at sa mambabasa ang pag-unawa ay inaasahan

Taglay ng isang tula ang lahat
lahat ng emosyong sa gawa ay ‘di masiwalat
Ang nagkukubling damdamin ng isang makata
na sa mundo ay ninais mapakita